هاتعمل زي حموكشة ولا.....

السلام عليكم ورحمة الله وبركاته
والصلاة والسلام على أشرف وأسعد الخلق أجمعين سيدنا محمد (صلى الله عليه وعلى آله وصحبه أجمعين وسلّم تسليماً كثيراً يليق بعظمته) أمّا بعد ...

المفروض نبدأ كلنا بالصلاة والسلام على الحبيب المصطفى وبعدين ندخل في الكلام في أي حاجة بما لا يغضب الله عز وجل

طيب ... إيه حكاية البنت اللي شفتها حضرتك من أول نظرة دي؟

الموضوع بسيط جداً بس محتاج فلاش باك بسيط كده

حضرتك أكيد حاطط أوصاف معينة لفتاة أحلامك كلنا كده وأكيد برده المواصفات دي بتختلف من شخص للتاني حلو؟

تمام .. حضرتك قاعد في الكافيه أو في المدرج مستني المحاضرة المملة بتاعة الدكتور الفلاني والجو برد وعشان تدفى تفكّر شوية في البنوتة اللي إتخطف قلبك ليها لما شفتها داخلة المدرج أو عدت من جنبك وبتفكّر كمان هتقول لها إيه أو هتعبر عن إحساسك ناحيتها إزاي وده طبعاً بما لا يغضب الله وبنية صافية زي لبن بخيره .. هاهاها
ما علينا... إنت أكيد طبعاً هتعمل الآتي:
1- هتفضل مراقبها بنظرك لما تقعد في حتة وتتكلم مع بنوتة تانية كانت زميلتك وإتخنقت منها وهنا هييجي وقتها عشان تتكلم معاها عن فتاة أحلامك وأكيد طبعاً زميلتك السابقة دي هتنتهز الفرصة عشان تطلع القديم والجديد عليك وتذل في أهلك شويتين تلاتة عشان تقولك بس اسمها .. ما بالك بقى عن تفاصيل حياتها .. ربنا معاك
2- الحالة التانية : لو إنت واد محركش ومقطع السمكة وديلها ودماغها ومفتتها ميت حتة - ماتسألنيش إزاي - وجريء إنت طبعاً هتخش عليها وش بالنضارة الشمس والبادي الجامد والعضلات - مع العلم إن الجو شتا والشمس غايبة بس إنت أكيد حاسس بلوعة الحب وبالصهد من كتر التفكير - المهم - هتقولها لو سمحتي ممكن تليفونك عشان أنا بس كنت عاوز أنقل منك المحاضرة الأخيرة بتاعة الدكتور الفلاني مع إنك في الحقيقة مش طايق أصلاً تجيب سيرة الدكتور ده ولما بيعدي اسمه على بالك بتحس بالكره الشديد لمادتة وبيجيلك إمساك مزمن وإنت أصلاً ماحضرتش أي محاضرة له أساساً
المهم ... هيحصل طبعاً حاجة من التلاتة
1- إما تبصلك من فوق لتحت وتلسعك قلمين على وشك وتبلعك لسانك
2- أو تنفض وتيص الناحية التانية وكأنك مجرد حشرة ضارة بتزن شوية وبعدين تمشي
3- أو تديلك رقم التليفون اللي هيطلع تليفون أبوها وأكيد إنت طبعاً هتعرف صوته في الحال لما تتصل بيه بالليل وإنت متغطي ومتدفي وعمال تشرب في سوايل عشان العنطزة والمنظرة والأرننة وحاجات تانية كتير آخرها تاء مربوطة وانت بتسمع صوت في التليفون إنت مين يا ابن التيييييييييت وهعمل تييييييييييت يا تيييت يا ابن التييييت
هتتفزع إنت طبعاً وترفس البطانية وتقع على الأرض وتلاقى والدتك داخلة عليك وبتقولك : أنا قولتلك مليون مرة إغسل رجلك قبل ماتنام وخد دوا النحافة اللي دافعة فيه دم قلبي وإتغطى كويس عشان كوابيس كل ليلة دي أف .. أنا مش عارفة ألاقيها منك ولا من أبوك .. أف .. أنا زهقت
وفي النهاية حضرتك طلعت بتحلم وتقول في عقل بالك الحمد لله بس أكيد لما أدخل الثانوية العامة هعمل زي الواد حموكشة جارنا كل يوم مع بنت شكل بس أنا مش فاهم كل يوم بييجي هدومة مقطعة وأبوه بياخده عند الدكتور كل يوم
يا ترى إيه اللي حصله؟

هههههههههههه

المهم ... ماحدش ينسى يغسل رجله قبل ما ينام وإلاّ ....
طبعا واكيد ودة مستحييييييييييييييييييل يحصل ف القسم بتاعنا
سواء منه اومنها

هههههههههههههههه