الأعظم من الذنب الإصرار على الذنب
الأعظم من الذنب الجهر بالذنب
الأعظم بالذنب الفرح بالذنب
الأعظم من الذنب الزعل على فوات الذنب
انا مش هتكلم
على الذنوب وأنواعها وعقابها ولا هقول حد وحش وإلا حلو كل واحد أدرى بحالة وبحياته وعاقل بما فيه الكفاية
ولذلك هتكلم عن حاجة أتمنى أكون عملت فيها إفادة واخد ثوابها وهى نصيحة لكل فرد بيعمل ذنب أو بيعمل شئ يغضب ربنا
لاننا طبعا مفيش حد فينا معصوم من الخطأ
لذلك اتمنى نكون واحنا بنعمل ذنب نفكر فية ولو دقيقة واحدة .
نفكر فى ربنا لحظة أو على الاقل لما نعمل ذنب مش نكملة للأخر ونحاول نطلع باقل الضرر منة
يعنى مش نكون مصرين علية, مش تبقى نايم صاحى بتحلم بيه وهتنفذة يعنى هتنفذة مهما كان
أوقات كنير ربنا بينقذنا من ذنوبنا ويخرجنا منها وبيضيع عليك الفرصة فى انك تعمل ذنب, أوعى في الحالة دى تصر علية أو ترجعلة أو تفكر ازاى تعمله بطريق أخر أو بأسلوب تانى
أوعى لما ربنا ينقذك تحاول تعمل الذنب واعتبرها إشارة من ربنا أنة بيحبك وعاوزك ترجعلة تانى وانة سبحانة وتعالى بيحميك من نفسك ومن شيطانك ودايما واقف جنبك وبيقويك عليهم
ولو حصل وأذنبت أوعى تجهر بذنبك خلى الذنب يقف لغاية عندك وبس مش تجهر بيه ولا تفضح ذنبك مهما كان صغير فى عينك
وخد بالك من عدة أشياء اولها
انك عشان مسلم لازم تكون بتتصرف بأخلاق الإسلام لان كتير أوى هيكونو شايفين الإسلام من خلالك
وافتكر كمان انك ممكن تعمل ذنب وتجهر بية تفتح لغيرك مجال تانى انه يعملة ووقتها تاخد ذنبك وذنب من اتبعك ومن اتبع اتباعك ووقتها الحمل هيتقل عليك اكتر
يبقى اكتفى بذنبك وبس لعل وعسى يجى يوم عليك وتعرف غلطك وتتوب وربنا الهادى وبيقبل توبة كل واحد
واكبر جملة فيهم بجد هزتنى جدا جدا
هى الاعظم من الذنب
الزعل على فوات الذنب
عارفين بتوجع لية ؟ عارفين الجملة دى بتهز اى حد لية؟
لان ربنا بيكون بيفكر فيك وبيفكر فى انة يضيع عليك الذنب لانك مش فاهم ومش مدرك
بيكون سبحانة جل جلالة واقف سند ليك بيقويك على نفسك ويبعدك عن ذنبك ويقلل حمل ذنوبك
وفعلا يقف الذنب وبعد فرحة ربنا بيك انك مش عملت الذنب
يلاقيك زعلان وحزين انك مش عملتة وكانك بتقول يارب انا مش حاسس بيك ولا حبك حاسس بية
كانك بتقول مش قادر احبك مش قادر اعمل حاجة عشان خاطرك مش قادر اقاوم
او بتقول لربنا مش هاممنى اى حاجة والذنب كان احسن
تخيل لما يكون قلبك بالقسوة دى تخيل لما تكون مش شايف حتى قرب ربنا وحبة ليك تخيل لما تكون مبقتش تحس وتفرق بين الصح والغلط وبقى قلبك متحجر للدرجة دى اكيد احساس وحش وصعب واكيد لو حبينا نرجع لربنا وندعية هيكون صعب علينا بعدها لاننا رفضنا يكون جنبنا من الاول
كلنا فينا حاجة حلوة من جوانا وكلنا فينا فطرة الاسلام النضيفة بس احنا اللى قلوبنا بتتحجر ساعات من كتر ذنوبنا واوقات كتير بننسى ان غذاء الروح بالدين مش بالاكل والشرب واوقات كتير بنحن لربنا بس الدنيا بتاخدنا
واوقات بنقوم نصلى ركعتين ونقول يارب وحشتنى
كلنا فينا كدة وكلنا فطرتنا جميلة بس محتاجين نشيل شوية صدأ من على قلوبنا عشان نعرف نرجع لفطرتنا ولجمالنا تانى انا المرة دى بخاطب قلوبكم مش عيونكم ولا عقولكم يمكن يكون دة سبب فى رجوع شخص واحد لربنا
ربنا يهدينا جميعا وينور قلوبنا بهداة وبحبة ويتوب علينا اللهم امين
( منقوووول )
الجمعة سبتمبر 17, 2010 4:35 pm من طرف 
موضوع: الأعظم من الذنب 
